Box office a rawn par thar leh ta
Kar hnih chhung chu North American box office-ah sum lut a tlem hle a, kum eng emaw ti chhunga sum lut tlem ber ṭumte a nih hnuah a rawn par thar leh ta. Box office-ah hian lal thar a rawn piang a, chu lal thar rawn piang chu ‘It’ a ni.
North America-a movie sum lalut hnem ber ‘It’ hi horror movie a ni a, kar tawp chhung khan theatre 4,103-ah chhuah a ni a, heng aṭang hian USD mtd 117.2 zet sum a lalut. He film siam nana an senso hi USD mtd 35 chauh a ni a, a hlawhtling nghal hle.
‘It’ hian record a rawn siam nghal. R-rated movie, horror movie zinga chawlhkar khat chhunga sum lalut hnem ber a ni a, a hmaa record lo siamtu chu Paranormal Activity 3 kha niin, kar khat chhungin USD mtd 52.5 a lalut. Release aṭanga ni thum chhunga sum lakluh lamah, ‘It’ hi sum lalut hnem pathumna a ni.
Kumin chhunga movie tihchhuah tawh zingah ‘It’ hi sum lalut hnem pathumna bawk a ni. Kumin chhunga chawlhkar khat chhunga sum lalut hnem ber chu Beauty and the Beast kha a ni a, USD mtd 174.8 a lalut a, Guradians of the Galaxy Vol. 2 chu pahnihna niin USD mtd 146.2 a lalut. ‘It’ hi North America-ah chauh ni loin ram dangah pawh a che ṭha hle. Ram 46 aṭangin USD mtd 62 a lalut a, hengte nen kar liam ta chhunga a sum lakluh zawng zawng chu USD mtd 179.2 zet a tling.
Box office movie
“It” - $mtd 117.1
“Home Again” - $mtd 9
“The Hitman’s Bodyguard” - $mtd 4.8
“Annabelle: Creation” - $mtd 4
“Wind River” - $mtd 3.2
“Leap!” - $mtd 2.5
“Spider-Man: Homecoming” - $mtd 2
“Dunkirk” - $mtd 1.9
“Logan Lucky” - $mtd 1.8
“The Emoji Movie” - $mtd 1.1