Mizo Idol season 7 hmawr bawk hun a hnai zel a, zan khat chiah a awm ta. Zaninah hian Mizo Idol 2022 hmawr bawk fel a ni tawh dawn.
David Lalchawisanga Darlong, T Vanlalhmangaihi leh C Vanlalroluahtumi-te chu zanin hian hla pakhat ṭheuh hmangin an inel leh dawn a, chuta an point hmuh leh Thawhlehni zana an point hmuh bakah social media lama an vote hmuhte belhkhawmin, a tiṭha ber Mizo Idol an ni dawn.
Darchawi, Tripura tlangval David-a, Hunthar veng nula Hmangaihi leh Saichal/Ramthar veng nula C Vanlalroluahtumi-te zinga tu emaw ber hian Yamaha Aerox Scooter bakah Rs 2,00,000 nen an haw dawn a ni. Pahnihna chuan Rs 1,00,000 a dawng anga, pathumna chuan Rs 70,000 a dawng thung ang. 
Ka inbuatsaih ṭha tawkin ka hria: David Kumin Mizo Idol-a mipui lawm hlawh ber zinga mi leh fans ngah ber pawl, endiktu zinga mi Vari'n 'Zoram pawna awm Zohnahthlakte aiawhtu' ti hiala a sawi David Lalchawisanga chuan a inbuatsaihna a ṭha tawka a hriat thu a sawi a, result puan a huphurh lo!


David-a chuan Vanglaini zawhna chhangin result puan chu a huphurh hran lo tih a sawi. "Ka huphurh hran lo a, ka inbuatsaihna pawh a ṭha tawkin ka hre bawk," tiin a sawi a, Mizo Idol nih a inrin leh rin loh zawhna chu,"50% vel chuan ka ring ve deuh tho mai, ka hre lo le. Ka elpuite pahnih hi an thiam ka ti khawp mai. Ka thlen chinah hian ka lungawi tawh tho tho a ni," a ti.
David Lalchawisanga hi an khua Darchawi-ah hmun hnihah big screen-in an lo en dawn nghe nghe a, Mizoram lama a innghahna Phunchawng khawthlang hruaitute pawhin an thlawp ṭha hle a, anni pawhin big screen-in an lo en ve dawn bawk a ni.
Hmangaihi a zam lo! Hunthar veng nula T Vanlalhmangaihi chuan a zam hran lo tih sawiin result hriat erawh phurawm lutuk loa a hriat thu a sawi, "Ka phur ve tho a, mahse ka phur lutuk lo. Zam erawh ka zam hran lo," tiin a sawi. Idol a nih leh nih loh erawh zanina a zai dan azir a nih a rin thu a sawi a,"Zanin a zir a nimai. 50-50 velin ka inbeisei ve tho mai. Ka elpuite an thiam lutuka ka huphurh zo vek," tiin Vanglaini a hrilh.

Hmangaihi hi an vengin an thlawp ṭha a, zaninah pawh big screen-in an en dawn bakah eng result pawh nei se Company pengah an vengin an lo hmuak dawn tih a sawi.
Vli thukhawchang ve thung Saichal/Ramthar veng nula C Vanlalroluahtumi chuan result hriat chu phurawm a tih rualin a huphurh hle tih a sawi. "Mizo Idol nih pawh ka inbeisei chiah lo, ka hrethiam bik lo. Ka ṭhiante an thiam lutuk a," tiin Vanglaini a hrilh.

Top 3-a Gospel singer awmchhun Vli hi Saichal, Ṭingṭang kawnah ngei mai zanin hian big screen-in an lo en dawn a, Ramthar lamah pawh an en dawn bawk a ni.
Mizo Idol 2018&nbsp;Jerry Lalrinawma&nbsp;a inlan dawn ;&nbsp;Show + Result puan Zanin hi Mizo Idol season 7 Grand Finale a ni tawh dawn. Dar 8-a rik chuan Zonet Zawlbuk kan hmet chhuak furin a rinawm tawh a, Zonet pawt lote pawhin Zonet Empai kaltlangin show an en thei leh dawn bawk. Naktukah chuan Mizo Idol 2022 kan hre tawh dawn a ni.

Top 5-te an inlan leh vek dawn a, an zai ngaihnawm tak kan ngaithla leh dawn. Intihsiaknain bulṭan a ni dawn a, chu chu show ropui takin a zui ang. Top 5-te chiah hi inlan tur an ni lo, Mizo Idol season 6 winner Jerry Elaro a inlan dawn bawk.<figure><img src="https://api.vanglaini.org/image/image-medium/SVgl0aVkoBeelT9aXyVfISI6d9DTfMEJGD2Tv560.jpg" data-image="33549"></figure>