LCD Soundsystem thâwm a ring
An tan chuan thil lawmawm em em a ni tlat. Tunhma
aṭang tawha an la thlen phak loh an thleng a, Billboard 200 chart-ah a vawi khat nan rock band LCD Soundsystem chu pakhatnaah an awm ve ta.
LCD Soundsystem hi US-ah chuan an thâwm a ring a, an album thar ‘American Dream’ hi album dang aiin a thawm a lian. Kar liam ta chhung khan he album hi copy 85,000 hralh a ni a, heng zinga copy 81,000 hi album pangngai a ni. An hralh ṭhatna chhan pakhat chu an concert ticket leitute hnenah an album an pek tel vang a ni.
LCD Soundsystem hian album an tichhuak khât tawh hrim hrim a, tuna mi kum sarih hnuah an album hmasa leh ber a ni. Kum 2010 khan album ‘This is happening’ an tichhuak a, Billboard 200 chart-ah 10-na lai a thleng phak. Hemi hnu hian studio album an tichhuak lo ta vang vang a, kuminah an rawn tho leh chauh a ni.
A hmaa pakhatna luahtu, Lil Uzi Vert-a album ‘Luv is rage 2’ chu pahnihnaah a tla thla a, kar liam ta chhung khan copy 73,000 a hralh. XXXTENTACION album ‘17’ chu pathumnaah a awm a, copy 51,000 a hralh a, Kendrick Lamar-a album ‘Damn’ chu palinaah a la awm thei a, unit 40,000 lai a la hralh thei cheu bawk.
Billboard 200 chart
“American Dream” - LCD Soundsystem (85,000)
“Luv Is Rage 2” - Lil Uzi Vert (73,000)
“17” - XXXTENTACION (51,000)
“DAMN.” - Kendrick Lamar (40,000)
“American Teen” - Khalid (33,000)
“Evolve” - Imagine Dragons (31,000)
“Project Baby 2” - Kodak Black (30,000)
“Everybody” - Logic (29,000)
“Ctrl” - SZA (26,000)
“Divide (division sign)” - Ed Sheeran (26,000)