Upa lamah desktop computer a la lar zel ; Ṭhalaiten tablet an lawm teh chiam lo
Laptop ṭha tak tak a tam tawh a, chu mai bakah phone changkang leh ṭha tak tak a rawn chhuak reng. Chutihlai chuan computer pangngai kan tih, dawhkana hûn ruah chi, desktop computer hi upa lamah chuan a hralh a la kal zel.
US-a miin device an hman dan Comscore-in a zirchiannaah kum upa lam, a bikin, kum 60 chung lamah desktop computer hi a la lar ber zel a, heng mite zingah zaa 53 ten an la hmang. Chutihlaichuan kum 18 aṭanga kum 24 inkar zingah desktop computer hmang hi zaa 23 chauh an ni thung.
Ṭhalai zingah chuan phone hi an hmang nasa ta hle. Internet khawih nan bera hmang pawh an tam tial tial a ni ber. Heng ṭhalai zaa 66 zet chuan device an hman nasat ber chu phone a ni tih an sawi.
Tablet hi mi tam tak chuan changkang riauah kan ngai a ni mai thei a, US-ah chuan changkang riauah an ngai chuang lem lo. Ṭhenkhat chuan tablet hi upa lam hmanrua deuhah an ngai hial mai thei. Ṭhalai, device hrang hrang hmang zingah tablet hmangtu hi zaa 7 chauh an ni. Kum 65 chin chung lamah tablet hi an hmang nasa zawk a, chu pawh hmang nasa tak an ni lem lo. Upa zinga tablet hmangtu hi za zela 12 an ni.