‘Harh a hun e’ music video hi The Chosen-a an vocalist, Mawitei leh, Model Veng nula, Grace Zodinpuii te sak a ni a, a video-ah hian The Chosen band chuan an pui nghe nghe. He hla hi Rev. Zoramsanga phuah a ni a, recording hi Blue Waves-a tih a ni a, video hi SVP leh Blue Waves tena an khawih a ni.
‘Harh a hun e’ music video hi Synod Campus Ministry-in documentary an tihchhuah tur khuhhawnna leh hmahruai a ni a, original soundtrack-a hman tur hla pahnih zinga pakhat a ni. Hla pakhat dang hi Dr. Zothansanga’n a sa a, tihchhuah thuai a ni ang. ‘Harh a hun e’ music video hi Zonet-ah dah nghal a ni.
Documentary siam mek hi ‘Mizo ṭhalaite leh Tunlai Khaw­vel’ tih a ni a, October thlaa tihchhuah hman tura ruahman a ni. He documentary-ah hian Mizo zirlaite kawm an ni a, an zirlai hmathlir hrang hrangte zawtin an harsatna tawhte sutkian dan tur zirchianna a ni deuh ber mai. He documentary siamtute zinga mi, Synod Campus Ministry-a mi, hla phuahtu ni bawk, Rev. Zoramsanga chuan, “Mizo zirlai­tena an harsatna lian tak pakhat chu an zir chhuah hunah eng nge an tih ang tih hi a ni,” a ti.
Rev. Zoramsanga chuan, “Unemployment problem hi Mizo zirlaite buaipui pakhat a ni. Chumi sutkian a nih theihna tur chuan engtin nge kan tih ang tih chungchangah he documentary-ah hian mithiamte pawh kawm an ni,” a ti. Mizo ṭhalaite harsatna hi sutkian dan a awm em tih te, engtin nge an kal zel ang tihte he documentary hian a chhui a, chuvang chuan Mizo zirlaite tan chuan documentary pawimawh leh hlawk thlak tak a ni ngei ang.