Telethon aṭangin sum tuak chhuak hnem

US chhim lam state-te thlipuiin a nuai a, thlipui tuarte ṭanpuina tura sum tuak nana Telethon buatsaih chu a hlawhtling hle.

Thawhlehni khan Telethon an buatsaiha programme pakhat, Hand in Hand: A Benefit for Hurricane Relief chu TV-ah tihchhuah a ni a, hetah hian zaithiam lar tak takte zaiin, chung zingah chuan Stevie Wonder, Justin Bieber, Usher, Blake Shelton leh Demi Lovato te pawh an tel. He programme hi US-a network lian ber ber - ABC, Bravo, CBS, E!, Fox leh NBC-ah te tichhuakin, Apple, Facebook, Twitter leh YouTube-ah te stream a ni. Darkar khat programme an hman aṭangin USD maktaduai 14 zet an tuak chhuak.

Zaithiamho an zai kar lakah milar langsar tak tak ten thu an sawi a, an programme entute chu ṭanpuina pe tur­in an ngen. Thusawitute hi Leonardo DiCaprio, Beyonce Knowles, Matthew McConaughey, George Clooney leh Julia Roberts te an ni.

Hand in Hand: A Benefit for Hurricane Relief programme hi Stevie Wonder chuan bul a rawn ṭan a, Bill Withers hla ‘Lean on me’ hla a sa a, zaipawlin an pui bawk. Hemi hnu hian Leonardo Dicaprio leh Jamie Foxx an rawn lang a, Beyonce pawhin thu a sawi bawk. Beyonce chuan, “Khuarel chhiatna hian tumah thliar bik a nei lo. Pêm lut i nih leh nih loh a hre lo a, vun dum emaw, vun ngo emaw pawh a hre hrang chuang lo. Hispanic leh Asian te, Juda mi leh Muslim te, rethei leh hausa te pawh a thliar hek lo...hnam hrang, vun rawng hrang leh sakhaw inang lo tak takten an damkhawchhuah nana an inpui tlang dial dial ka hmuh khan mihringa rinna ka neih ṭhin chu a tuaithar leh a ni,” a ti.

Justin Bieber chu concert a cancel hnua mipui hmuha TV-a a inlanna hmasa ber atan a rawn inlan. A chawlh chhung hian thlarau lamah a intuaithar ngei a nih hi tih hriat theihna chu thlipui tuartute tan a ṭawngṭai hi a ni. Matthew McConaughey pawhin thu tawi a sawi. Show neih chhung zawngin zaithiam leh milarte hian heng thlipui tuartute ṭanpui nan mipuite chu an theih ang anga che chhuak turin an sawm hlawm.