Nuai chuang man phone tichhuak ta
Apple chuan an phone siam thar pahnih chu an khuhhawng ta a, India-ah erawh lei theih a la ni rih dawn lo. A man a to dun hle a, a man tlawm zawk chi man pawh hian two wheeler ṭha tak a lei theih ang!
Apple phone khuhhawn pahnihte hi iPhone 8 leh iPhone X te a ni. iPhone 8 hi chi hnih - iPhone 8 pangngai leh iPhone 8 Plus te a awm a, a man a tlawm hle a, Rs. 89,000 man vel tur a ni. iPhone X erawh a to deuh hlek a, India-ah hian Rs. 102,000-a zawrh tura beisei a ni. iPhone X hi a spec a zira man tlawm chi leh to chi a awm a, cheng nuai khat man hi iPhone X 256GB a ni.
iPhone 8 hi India-ah chuan September 22 aṭanga hralh chhuah a ni ang a, iPhone X erawh chu October 22 aṭangin pre-order a theih ang a, November 3 aṭangin an zuar chhuak ang.
iPhone X hi a changkang hle. Home button hranpa a awm tawh lo a, unlock tur chuan a hmai i zuk thlek zawk kha a tâwk mai! Chumi awmzia chu a neitu ni lo tan chuan a hawna hawn chi rual a ni dawn lo. Sensor hrang hranga thuam a ni a, flood illuminator, infrared camera, front camera, leh dot projector sensor hmangtea thuam a ni. A hmaia zu en a, in-unlock ang chi system hi Face ID an vuah. An sawi dan chuan he facial recognition tech hi a turu hle; i sam chei dan thlakin, lukhum khum emaw khum lo emaw pawh, hmui hmul i zuah hma leh zuah hnu thleng pawhin a hre reng thei dawn che! Fingerprint scanner erawh a awm tawh lo. iPhone tharte hi a changkang tawh hle a, wireless charge technology te nena thuam a ni.