Khawvelin a ngaihven NFL Super Bowl halftime show chu Pepsi-in an sponsor tawh dawn loa, Apple Music-in an sponsor tawh thung dawn.
Kum khat chhunga TV kaltlanga thlirtu ngah ber ṭhin zinga mi NFL Super Bowl halftime show hi Pepsi chuan kumin May thla khan an sponsor tawh dawn lo tih an sawi a, kum tam tak chhung an thawhdun hnuah an thawhdunna chu an titawp ta a ni. 
Apple Music and Beats-a Apple vice president chuan,"Rimawi leh infiamna hian kan thinlungah hmun pawimawh bik tak a luah a, chuvang chuan rimawi leh football stage lian ber peng pakhat Apple Music a ni tur hi kan phur tawh hle a ni," tia sawiin Apple Music Super Bowl Halftime Show-a performance ropui tak buaipui an chak tawh thu a sawi bawk.
Apple hian tunhnaiah infiamna lamah thawm an nei zeuh zeuh a, an streaming platform-a chhuah turin Major League Baseball leh Major League Soccer-te pawh inremna an lo siampui tawh a ni. Apple sponsor-na hnuaia NFL Super Bowl halftime show hmasa ber chu nakkum February 12 hian Glendale, Arizona-ah neih a ni dawn.
Dr. Dre, Snoop Dogg, Eminem, Mary J. Blige leh Kendrick Lamar-te inlanna Super Bowl LVI halftime show kha mi maktaduai 120 velin an thlir niin an chhut. Super Bowl halftime show-ah hian khawvela artist lar ber ber inlan an tam tawh hle a, The Weeknd, Jennifer Lopez, Shakira, Beyoncé, Justin Timberlake, Lady Gaga, Katy Perry, Bruno Mars, Michael Jackson, Coldplay leh artist dang eng emaw zat an inlan tawh a ni.