Zofa Lelte : District pariatah audition zo fel tawh

Zoram Thar Zofate Lairelna hmalakna zai intihsiakna 'Zofa Lelte 2022' Audition Round chu district pariat Aizawl, Lunglei, Lawngtlai, Siaha, Hnahthial, Serchhip, Champhaiah leh Khawzawlah neih a ni tawh.

Nilaini zanah khan Khawzawl District-ah audtion neih niin contestant sawmhnih chuang an tel a, B. Lalramnghaka (Anghaka Bawitlung), C. Laltlanliana (Matlana), K. Lalrawngbawli (RB Khawlhring) leh Lalruatfela (Mapuia) te chu endiktu an ni.

Saitual, Kolasib leh Mamit District-te bakah Manipur, Bangladesh leh Tripura-ahte audition neih chhunzawm a ni leh dawn bawk.

Zofa Lelte zai intihsiakna hi Zo Hnahthlak zawng zawng huap Zo ṭawng hrang hrang zai intihsiakna huang awmchhun a ni a, he zai intihsiakna hian a tum ber chu Zofate 'Kristaa Hnam Inpumkhat' hi a ni. Zo ṭawng hrang hrang hmangin contestant-te'n intihsiakna an hmachhawn a, endiktute pawh Zofate zinga zaithiam leh rimawi lama tawnhriat ṭha tak tak nei, Zo ṭawng hrang hrang thiam hman an ni tih a buatsaihtute chuan thuchhuah an siamah an tarlang.

Contestant-te hian Gospel/Pathian hla emaw Hnam hla (inpumkhatna lam hawi) an sa thei a, Top 90 result chu Octo-ber 12-ah puan a ni ang. Top 90 thlan-chhuahte'n Vaivakawn Hall-ah intihsiakna an hmachhawn chhunzawm ang.

Media partner-ah LPS hmangin, district tinah organising committee-te an din a, khawtlang hruaitute leh rimawi lama tuimiten ṭhahnemngai takin hma an lo lakpui bawk a ni. Zofa Lelte chanchinthar hi Zofa Lelte Instagram leh Facebook page-ahte chhawpchhuah zel a ni.