Ṭhazual Awards 2017 ; Nomination list tihchhuah a ni ; Category pakhat aia tama lang thei zaithiam leh group/duo pasarih an awm
Ṭhazual Awards 2017 nomination list tar chhuah a ni a, category pakhat aia tama lang thei zaithiam leh group pasarih an awm. Ṭhazual Awards-ah hian Gospel leh Lengzem a awm a, heng chi hnih hnuaiah hian category panga ve ve a awm.
Gospel huang chhungah hian Amtea, Mawitei ft Open Strings, TBC Zaithanpui leh One in Christ te chu category pahnihah ṭheuh an lang. Heng palite hi Best Music Video huang chhungah an inel dawn hlawm a, Amtea leh TBC Zaithanpuia te hi Best Male Artist-ah an awm ve ve a, One in Christ leh Mawitei ft Open Strings te hi Best Duo/Group-ah an inel a ngai dawn.
Lengzem huang chhungah category pahniha lang thei pathum an awm a, hmeichhia hlir niin, DJ Lalvenhimi, Feli Fanai leh Zorinzuali Khiangte te an ni. Anni pathum hi Best Music Video category-ah nominee an ni vek a, Best Female Artist-ah an inel hlawm dawn bawk.
Best New Artist category hi ngaihven hlawh tura ngaih a ni. Tunlaia zaithiam rawn lar thar, social media-ah pawh sawi hlawhte kan hmu hlawm. Gospel-ah Cindy Lalramhlimawmi, Cindy Lalthanpuii, Miriam Lalnundiki, Sangtei Renza leh Thelma te an intlar. Lengzem lamah chuan Aziri, Grace 10:45, Kimkima, Lilzo leh Mercy Remsangmuani te an ni. Mimala en chuan a dawng tur âwm ber pawh hriat leh rin thiam a har viau ang.
Ṭhazual Awards-ah hian Ṭhazual chart-a an thlen san leh san loh chu tehna tur a ni dawn lo a, he chart-a an lan rei leh rei loh pawhin nghawng a nei thui lo mai thei. A thlangtu tur hi zaithiam hote tho an ni a, Android application hmanga an thlan tur a ni dawn a, chuvang chuan lar ringawtin awmzia a nei thui lo thei; tawnhriat nei leh music luhchilh tak taktena ṭha an tiha an thlan chhuah turte hriat a chakawm tawh hle.
Ṭhazual Awards thlangtu turte hi MDM member-te an ni. Music Domain Mizoram chuan MDM member-te chu an phone number hman lai ngei MDM Office Assistant hnenah a rang lama thehlut a, hriattir turin an ngen. Mahni phone number thehlut lote tan chuan thlan theih a ni lo dawn lo tih MDM hruaitute chuan an sawi.