India-in film a tichhuak hnem ber

UNESCO Institute of Statistics-in a tihchhuah hi a chhiar kum a hlui deuh tawh nachungin, site dangin nikuma film tih­chhuah zat a tarlanah pawh India hi khawvela ramte zinga film tichhuak hnem ber a ni tho. UNESCO Institute for Statistics-in a tarlan hi kum 2011-a mi kha a ni a, heta list-ah hian India chu film tichhuak hnem ber a ni a, 1,255 zet film a tichhuak. Insidermonkey-in nikuma film tihchhuah zat a tarlanah pawh India bawk chu film tichhuak hnem ber niin, film 1,724 zet a tichhuak.

India dawta film tichhuak hnem leh chu Nigeria niin, kum khat chhungin film 997 zet a tichhuak a, United States chu film tih­chhuah tam lamah pathumna a ni a, film 819-a a tichhuak. China-ah kum khat chhungin film 584 tihchhuah a ni.

Film-tena sum an lakluh lamah North American box office tluk pha an awm lo. Nikum chhung khan khawvel puma film tih­chhuah zawng zawngten sum an thawhchhuah zawng zawng hi Theatrical market Statistics 2016-a a landanin USD tluklehdingawn 38.6 zet a ni a, North American box office sum thawh chhuah zawng zawng chu USD tld 11.4 a ni. North American box office tih hian United States leh Canada te a huam.

China film-te chu sum lalut hnem pa­hnihna an ni a, China rama film tihchhuahten nikum chhunga sum an hmuh chhuah zawng zawng hi USD tld 6.6 a ni a, Japan film ten USD tld 2 lalutin, pathumna an ni a, India chu palina a ni. India rama film tihchhuah ten nikum chhunga sum an thawh chhuah zawng zawng hi USD tld 1.9 a tling a, khawvel pumah palina a ni. United Kingdom-a film ten USD tld 1.7 lalutin pangana a tling pha.