Mizo Idol 2022 T. Vanlalhmangaihi
Zirtawpni liam ta zan khan Mizo Idol Season 7 chu a hmawr bawk fel a ni ta a, Hunthar Veng nula T Vanlalhmangaihi chu pakhatna niin Saichal/Ramthar Veng nula C Vanlalroluahtumi chu pahnihna a ni a, Tripura/Phunchawng tlangval David Lalchawisanga Darlong chu pathumna a ni thung.
Zaithiam 400 chuang intihsiak zinga a ṭha bera thlan chhuah T Vanlalhmangaihi hi intihsiak ṭantirh lamah kha chuan boruak nei lian ber zinga mi a ni lem loa, Top 10 aṭang khan rawn che ṭha chhoin fans pawh a ngah ṭan viau a, Top 5 intihsiaknaah che ṭha lehzualin Top 3 intihsiakna an zawh hnu phei chuan Mizo Idol a nih ngei ring an tam tawh hle. Chutiang khawp chuan intihsiak chhungin hma a sawn a, a tawpah phei chuan Mizo Idol 2022 title hawntu a ni ta hial reng a ni.
Pakhatna a nihpui hlate chu..
Kum 21 mi T Vanlalhmangaihi hian Mizo Idol buatsaih a ni dawn tih a hriat aṭangin tel ve ngei a tum tih lo sawi tawhin chumi atana a inbuatsaihna kawng khat atan leh a aw tih-fitna tur atante Seki Beat Contest-ahte a tel hial tih a sawi.
Top 3 intihsiak zan khatnaah 'Lo let la ka kiangah' tih leh 'I tan' a sa a, Grand Finale zanah khan hla hlui 'Lalte' chu rawn thar thawh lehin chung hla pathum hmang chuan Mizo Idol 2022 title a hawn ta a ni.
Grand Finale zan kha
Hmangaihi, Vli leh David Darlong-te chu hla pakhat ṭheuh hmangin an intihsiak leh. Top 3-a Gospel singer awmchhun Vli chuan 'Min chawisang la' hmangin intihsiakna a hawng a, David-a chuan 'Ngaihzual' hnehsawh taka rawn sa lehin Hmangaihi chuan 'Lalte' hmangin intihsiak bik chu a rawn khar ta a ni.
Intihsiak zawhah Mizo Idol season 7 Top 5-te'n show hmuhnawm min hmuhtir a, in lam leh a hmuna kalte mit leh beng a tlai. Top 3-te bakah Top 5-a kan thlah takte an inlan leh vek a, Deborah leh Lalngaihzuali-te pawhin hla pathum hmangin Mizo Idol show entute an awi a ni. Show zawhah Mizo Idol 2022 Top 3 result puan niin T Vanlalhmangaihi chu Mizo Idol niin an veng lamah a haw ta a, Hunthar veng lam pawhin Company pengah ropui takin an lo hmuak bawk a ni.
Top 3-te lawmman dawn chu
Hunthar Veng nula Hmangaihi hian Rs. 2,00,000 leh Yamaha Aerox scooter a dawng a, Pahnihna C. Vanlalroluahtumi chuan , Rs. 1,00,000 leh Solar Inverter Set a dawng. Pathumna David Lalchawisanga Darlong chuan Rs. 70,000 leh Samsung Washing Machine a dawng ve bawk a ni.
Darbu lama an hla hralh dan
Mizo Idol 2022 hi Top 10 intihsiak aṭang khan an hlate chu Darbu Apps lamah Rs 15-a zawrh chhuah niin September 23 tlai thleng khan Rs 1,94,000 man hla an hralh hman.
Top 3-te hla hralh dan:-
Hming Sum hmuh zat Leitu
T Vanlalhmangaihi Rs. 44,803 2328
David Lalchawisanga Darlong Rs 27,945 1227
C Vanlalroluahtumi Rs 8,664 500
Mizo Idol contestant zinga Darbu-a hla hralh ṭha ber chu Eddie Malsawmtluanga a ni a, Rs. 72,067 man hla a hralh. Mizo Idol Top 10 zai hi Darbu-ah leitur a awm vek a ni.
Mizo Idol lo ni tawh te :-
2007 - Lallawmpuia, Champhai
2009 - Lalchhanchhuaha, Sumsuih
2011 - Lalthuṭhaa, Siaha
2013 - Grace Lalchhanhimi, Kolasib
2015 - Rebecca Zorintluangi, Sairang Sihhmui
2018 - Jerry Lalrinawma, Chanmari Veng, Aizawl
2022 - T Vanlalhmangaihi, Hunthar Veng, Aizawl