Fiona Pachuau ‘Min chawlhtir rawh’ tiin a chawl rih dawn!?

Fiona Pachuau hla thar ‘Min chawlhtir rawh’ tih chu MDM Library-ah dahin, TV lamah pawh dah a ni. He hla hi Tetea (Dinsanga) phuah a ni a, music hi Albert-a siam a ni. Blue Waves-ah recording hi tih a ni a, video hi SVP kutchhuak a ni. Kumina a solo video hmasa ber a ni a, kumin­ah ‘I hming chauh’ hla hmangin pakhatna a luah a, he hla hi nikum lama a siam a ni thung.

The Chosen band aṭangin kan hre hmasa a, chumi hnuah solo-in kan hmu ta fo bawk. Fiona Pachuau hian music video pali a siam ve ta. ‘I hming chauh’ tih hla pawh kuminah a hlawhtlinpui hle a, a zawnin pakhatnaah vawi hnih lai a awm thei a nih kha. Fiona chuan, “Khatiang taka a hlawhtlin kha chu ka ring pha lo, amaherawhchu kha music video kha theihtawp chhuaha kan siam a ni. Delhi-a recording kan tih a ni a, a record pawh a ṭha a, pakhatna kha chu beisei em em lo mah ila, beisei erawh a sang tho mai,” a ti.

Tuna music video thar a siam ‘Min chawlhtir rawh’ tih hla pawh hi theihtawp chhuah a, a ṭha thei ang ber tura a siam a ni. Hla thar a ni lo a, a lo sak fo tawh ṭhin a ni, “Kum 2007 aṭang daih tawha ka sak ṭan tawh kha a ni. Hla thar a ni lo a, a nalh ka ti a, ka duh a, a hla thu a ṭha ka ti bawk. Chuvang chuan record loh leh music video siam miah loa dah ka ui a, ka siam ta a ni,” a ti.

Fiona Pachuau hi an band, The Chosen nen hla phuahtu lar, fam ta, Parema kaihhruai nasat a ni a, Parema thihna pawh hian a nghawng hle a, a ui hle. “Music kan luh chilh tirh aṭanga min kaihruaitu leh min buaipuitu a ni. A thihna kha kan tan chuan chânna nasa tak a ni. Pathian thu nen, zirna lamah pawh min fuihtu a ni a, kan band tan kha chuan kan pa ang tak tak a ni. Min tihpui hun chhung a reilo nain, nasa takin hma kan sawn a ni,” a ti a, Parema a ui hle a, an band leh ama tana mi pawimawh leh ṭangkai a nih thu a sawi.