‘It’ bawkin record a siam

Box office lamah chuan horror film ‘It’ chu a chawlhkar hnihnaah pawh a hlawhtling leh hle a, North America-ah chuan sum lalut hnem ber a la ni.

‘It’ film hian kar tawp ni thum chhung khan USD mtd 60 zet mai a lakluh belh leh. He film hi North America-ah hian ni 10 chhung chhuah a ni tawh a, hemi chhung hian USD mtd 218.7 lai mai a hmu tling tawh. Ram dang aṭangin USD mtd 60.3 a lalut a, hengte nen, khawvel pum aṭanga sum a hmuh tawh zawng zawng chu USD mtd 370 a tling tawh.

‘It’ hian record a siam a, September thlaa film tihchhuah tawhte zingah chuan ‘It’ hi sum lalut hnem ber a ni. A hmaa September thlaa sum lalut hnem ber ṭhin chu kum 1986-a mi Crocodile in Dundee kha a ni a, USD mtd 174.8 a lalut a, ‘It’ hian a rawn khum ta a ni. Horror film zingah chuan The Exorcist kha North America aṭanga sum hmuh hnem lamah a la tluk lo a, kha film khan USD mtd 232.9 a lalut a, pha tur chuan USD mtd 14.2 a la ngai.

American Assasin chu sum lakluh hnemah pahnihna a ni. He film, Dylan O’Brien channa hian kar tawp chhung khan USD mtd 14.8 a lalut. Darren Aronofsky film ‘mother!’ chu sum lakluh hnem lamah pathumna a ni a, he film hi psychological thriller film a ni.

Box office movie

“It” - $mtd 60

“American Assassin” - $mtd 14.8

“mother” - $mtd 7.5

“Home Again” - $mtd 5.3

“The Hitman’s Bodyguard” - $mtd 3.55

“Annabelle: Creation” - $mtd 2.6

“Wind River” - $mtd 2.55

“Leap!” - $mtd 2.1

“Spider-Man: Homecoming” - $mtd 1.9

“Dunkirk” - $mtd 1.3