Josephine-i a tlin tâwkin a rawn che!

‘Ka zawt a che’, ‘I lo ni reng si’ tih hlate hmanga Ṭhazual chart top 10-a a rawn invawrh chhuah hnuah Josephine Lalawmpuii chu a tlin tâwk ang zelin a che a ni ngei ang ‘Ka tlin tâwk’ hla nen a rawn lang leh.

Josephine Lalawmpuii hian ‘Ka tlin tâwk’ hla chu music video-a siamin a rawn peih leh ta der a, he hla nen hian eng chen nge a thlen ang tih lo thlir leh ila. A zaithiam a, chuvang chuan a thlen hniam a rinawm loh. Josephine-i hla thar hi John Mawitea leh Mapuii Fanai te hla phuah a ni. He mite nupa hi tunlaiah na na na chuan hla phuah thiam lar leh hlawhtling an ni a, An nupaa an hla phuah tam tak hmangin Mizo mipuite lunglen min hnemtu an ni.

‘Ka tlin tawk’ music video atan hian Jeyvee Jongte chuan Josephine-i hi a chei a, a chei thiam hle. Foster Records-ah a record a, music hi Lal K. Sailo siam a ni. Josephine-i chuan, “Tuna ka hla hi a hla thu lamah chuan a hmaa ka hlate nen a inang lo hle,” a ti. “A hmaa ka hlate kha chu heartbreaking lam a ni a, tuna mi erawh hi chu elsenna lam rawngkai a ni thung,” a ti.

Josephine-i tan tuna a hla hi a solo-a kumina a video hmasa ber a ni a, Thangromawia nena duet-a an zaina pawh kuminah an ti­chhuak tho a nih kha. Hei bakah hian hmachhawp eng eng emaw a la nei a, chung zingah chuan fam ngaih lam hla pawh a tel. Fam ngaih hla erawh hi chu kumin kum tawp lama tihchhuah a tum a ni.