Khiangte Construction Ṭhazual Lengzem ; Siampuii Ralte 'Ngaihzual nangnen' a ngaihawm zual

Khiangte Construction Ṭhazual Lengzem chart-ah Siampuii Ralte chuan 'Ngaihzual nangnen' hmangin ro a rel.

Sihphir tleirawl zaithiam Siampuii hi tunlai lengzem singer zingah chuan lawm hlawh leh sawm hlawh ber zinga mi a ni a, tuna fam ta Ellis Saidenga hla a rawn thar thawh leh 'Ngaihzual nangnen' pawh hi a sa mawiin a hit leh hle. Thla khat vel liam ta khan YouTube-ah dah chhuakin thlirtu nuai li chuang an awm der tawh a, hei hian a zai ngainatu an tam hle tih a tichiang. Siampuii hi a hla sak apiang a 'hit' zel emaw tihmai tur a ni a, mi hla sak tawh sa a rawn thar thawh leh pawh chet ṭhatpui zelin Ṭhazual chart lamah pawh sang tak a invawrhpui thei zel a ni.

Lowdy ft Francis 'Damchhung' chu pahnihnaah a rawn inhlangkai ta bawk a, Bethseby Khithie ft Manaha 'Ka vantirhkoh' chu pathumna a ni bawk.

Chart-a hla langte an ṭha rual hle a, palina pawh tunlai lengzem singer lawm hlawh ber ber- Feli Fanai, Zaii Hauchhum leh Michelle Varte-te thawhhona 'Ka tan i mawi' kha a ni. Lowdy hla tho 'Tibuaitu' chu pangana a ni thung.

Ṭhazual top 10-ah hian Marina V Varte, Lalropuii Pachuau, John Lalbiaktluanga, Jt Production leh Ngurthansanga-te chu top 10-ah an lang ve bawk a ni.