Zorinsanga Sailo ft. Nuna Hmar (BOG) 'Isua chauh' a chhuak ṭep

Zorinsanga Sailo chuan hun eng emaw chen music video thar a tihchhuah tawh loh hnuah Boyz of God Nuna Hmar thawhpuiin hla thar 'Isua chauh' an tichhuak dawn.

'Isua chauh' hi sap hla 'Jesus Can', Austin French sak niin Amtea chuan Mizo ṭawngin a letling a ni.

Zorina chuan,"Nikum khan tuna kan branch KṬP Leader ni mek U Chhanhima hian i sa thiam ngawt ang tiin a English hla 'Jesus Can', Austin French sak hi min rawn thawn a, a mawi ka ti khawp mai. Chuan Amtea hian min leh sak a, mahse rap part a awm avang hian duh angin ka leili hian rap hi ka ti mawi zo ve dawn si lo a, a hla mawina ka phawk chhuak zo dawn si lo. Rap part min sakpui tur ka zawng ru ngat ngat a, Nuna Hmar BOG hi ka zuk bia a, aniin lawm leh phur deuhin min lo chhawn ta a ni," tiin a hla thar tihchhuah tur chungchang hi Vanglaini a hrilh.

Nikum September thla vel aṭanga an buaipui ṭan tawh kha a ni a, mahse, harsatna neuh neuh an neih avangin an puitlin thei lawk lo a, tunah erawh an puitlin thei ta a ni.

Soundtrack chu Adia Chhakchhuak, Lunglei siamsak niin audio recording chu Biaka, HC Recording-in Zorina piancham pualin a sponsor nghe nghe. Backing vocal ngaihnawm tak ngaihthlak tur a awm tel dawn a, chu chu MChoir lama Zorina telpui ṭhinte'n an pui a ni. Video chu Bilywaif kutchhuak a ni bawk.

A rap part hi an letling mawl tawp lo a, Nuna Hmar-in a hla zul zuia ama irawm chhuaka a rap line hi a siam a nih thu Zorina chuan a sawi.

'Isua chauh' hi Zonet Cable TV bakah YouTube lamah thlira ngaihthlak theih turin an chhawp chhuak thuai dawn a ni.