Best Female Artist Gospel ; Thiam lo bik thlan tur an awm chuang lo

Ṭhazual Awards hi kum 2015 aṭanga sem ṭan kha a ni a, a hmasa berah khan Pensy B. Lalthangliani chu Gospel huang chhungah, Best Female Artist-a thlan a ni. Nikum khan Bethsy-i chuan Best Female Artist a la a, kuminah pawh nominee-a chhawp chhuah a ni. Bethsy-i hi kumin bikah chuan ‘Mifelte chauh thlang lova’ hla hmangin Ṭhazual Top 10-ah kan hmu a, pahnihna hial a thleng thei. He hla hi Ṭhazual Award nikum leh kumina sem inkara a hla tihchhuah kan hmuh langsar a ni.

Grace Lalchhanhimi hi zai lamah chuan Mizo Idol-a thlan chhuah hial khawpa zaithiam kha a ni. Kuminah ‘Krawsah chuan’ hla hmangin Ṭhazual chart-ah pakhatna a luah thei a, hei bakah hian ‘Min hmangaihna hi’ tih hla chu top 10-ah a lang pha a, chart tihchhuah hnuhnun berah khan ‘Rawngbawl tura chhandam’ hmangin pathumna a luah pha. Kum 2015 khan Best New Artist-a thlan a lo ni tawh a, nikum khan award a dawng lo thung.

Best Female Artist (Gospel) huang chhunga nominee zingah Hlimhlimi hi Ṭhazual Award la dawng lo awm chhun a ni a, chutihlaiin music khawvelah chuan hnuhma a hnutchhiah hnem a, chart lamah pawh dinhmun ṭha lo chang fo tawh a ni. Kumin bikah ‘Inenfiah rawh’ hla nen chart-ah a lang a, pahnihna ṭum hnih hial a luah thei.

Temi Sailo hi ‘I thiam an hril’ hla nen Fakna chart-ah a lang mek a, chart tihchhuah hnuhnun berah khan pariatna a ni a, August 14 khan pahnihna a thleng pha hial. Ani hian mimal angin Ṭhazual award a la dawng lo a, nikum khan Best Duo/Group award chu Bethsy leh Pensy te nen an indawn ṭawm.

Chart-a thlen san aṭang ringawta teh tur ni ta se chuan thlan chhuah a ziaawm deuh ang. Amaherawhchu chart-a thlen san hian hmun a chang pawimawh ber lem dawn lo. Kumin hian a thlan dan tihdanglam a ni a, zaithiam hoten an vote dawn a, chuvang chuan rinlawk thiam pawh a har hle.