Alien Invasion Tlengtle vangin US a buai mek

Rannung leh nungchate an awmna tur hmun leh rama an awm loh a, hmun dang leh ram danga an awm hian an va awmna ramah harsatna tam tak an siam thei a, environment lamah chhiat­na nasa tak an thlen thei. Tlengtle chi khat pawh hian Canada leh US-ah harsatna an thlen mek a, heng ram pahnihte hian an buaipui hle.

North America-a thing chi khat, Ash thing an tih (Fraxinus leh Sorbus) chuan tlengtle chi khat, Emerald Ash Borer an tih, Agrilus planipennis hi a haw hle. Hetiang tlengtle hian ash thing a beih tawh chuan kum hnih kum thum hnuah a thi mai a, a beih nasat phei chu kum khat chhungin a thi hman. Ash thing hi North Ame­rica-ah chuan an hmang ṭangkai hle a, bungraw siam nan te, baseball bat siam nan te, khel kawm (hockey stick) siam nantea an hman ṭhin a ni. Tlengtle avang hian ash thing hi a thih rem mai a hlauhawm hle niin North America-a environmentalist-te chuan an sawi.

Tlengtle hring ang chi hi North America-a awm ngai lo a ni a, kum 1990 chho vel aṭanga America-a lut, inthlahpung ta an ni. Heng tlengtlete hi Asia rama awm ṭhin an ni a, Asia rama thingte chuan tlengtle beihna laka inven theihna an nei a, tlengtle hian eiin, hreuh nasa mah se, a haw ve em em lo. North America-a thingte erawh chuan tlengtle laka inven theihna hi an nei ve lo a, chuvang chuan an haw bik hle a ni. Asiaaṭanga US-a thing an tawlh luh emaw, thing hmanga siam thil an thawn luha awm ve, US-a thlawk chhuak a, darh ta nia ngaih an ni.

Ohio State University-a entomologist, Dan Herms chuan, “He rannung hi North America ramngaw rûntu rannung hlauhawm ber a ni,” a ti. US-a state 30-ah heng tlengtlete hi hmuh an ni a, Canada pawh nasa takin a khawih. Thing kawr karah an tui a, an tui hi chawlh­kar hnih hnu velah a keu a, pangangah a chang ṭhin. Heng pangangte hian thing hi an ei a, pangnga an tam phei chuan ash thingte hian an thih phah tawp tawp thei a ni.

Hetiang, an awmna hian ram ni miah loa rannung emaw, thing leh hnimte hmun danga an awm a, an awmna rama harsatna an thlen ang hi environmentalist-te chuan Alien Invasion tiin an sawi mai ṭhin a, hetiang rannung hi invasive insect an ti a, thlai leh hnim lam chu invasive plant te an ti ṭhin. Mizoramah pawh hian thil tam tak kan lalut a, hengte hian kan ram hi engtiang­in a fan a, a khawih tih zirchianna a awm lem lo a, kan fimkhur loh chuan harsatna tam tak tawh phah theih a ni.