PUC Various artist music video Mizorama music video thui ber tlangzarh

Pachhunga University College-a zaithiam hrang hrangte zaina music video ‘Zoram rohlu PUC’ chu nimin khan PU College principal, Dr. Tawnenga’n a tlangzarh.

‘Zoram rohlu PUC’ music video-ah hian PU College-a zirlai, Mizoram pum huap pawha zaithiam hriat larte an zai. He music video-ah hian Ṭhazual chart-ah pawh pakhatna lo luah fo tawhte kan hmu a, Cindy Lalthanpuii, Mizo Idol hnuhnung ber Rebecca, Nunna Thar ost thiam taka satu Wendy, ‘Beiseina’ hmanga chart-a pakhatna luah thei Sangtei Khawlhring, Youth Icon-a pahnihna ni thei Duhsaki, Mizo Idol aṭanga kan hriat lar Omomi, Ṭhazual chart-a kan hmuh fo Hlim­hlimi te, Vanlalnunpuia, F. Lal­remruata, R. Vanhmingmawia, rapper Saiawmpuia leh Lal­hruaitluanga te an zai.

PUC-in music video an tlangzarh hi Mizorama music video tihchhuah tawha thui ber nia ngaih a ni a, minute 12.08 zeta sei a ni. He hla hi H. Lal­dinmawia, PUC-a Asst. Professor phuah a ni a, a thluk hi Manase Saphmingthanga siam a ni.

Music video tlangzarh inkhawm hi Remlalthlamuanpuia, Asst. Prof., chuan a kai­hruai a, Zothanmawia, Mystique School of Music chuan a thlir lawk. Kings and Prophets chuan music hi siamin, he hmunah hian an record a, aerial photography hi Mazuala leh LSA kutchhuak niin, videography hi Leitlang Pictures a ni.