Ṭhazual Awards VIFAM-ten Best Music Video an endik dawn

Ṭhazual Awards sem turah Gospel-a Best Music Video huang chhungah Adonai’s Choir hla ‘Ka van in’, Amtea hla ‘Ka hming a hria’, Mawitei ft. Open Strings ‘A vul zel’, TBC Zai­thanpuia ‘Zawh ka zuam lo’ leh One in Christ hla ‘Ka Pa lalram’ tihte a lang. Lengzem huang chhungah DJ Lalvenhimi hla ‘Ka tan a chuai’, Feli Fanai ‘Pheichheh mawi i khai ang’, Manuna ‘Duhaisam’, Michelle Varte ‘Sakhmelṭhachuang’ leh Zorinzuali Khiangte ft 135 ‘Ka ngaidam che’ tihte an lang.

Heng music video, nominee-te hi Mapuia Chawngthu, Lei­tlang Pictures chuan, “A âwm viau ka ti. A aia ṭha music video dang a awm chuangin ka hre lo,” a ti. Mapuia Chawngthu chuan, “Kan endik dan turah hlawm thumin a ṭhen theih ang. Pakhatnaah chuan technical lam a ni dawn a, hetah hian camera, lighting, editing te kan thlir ang. Chumi bakah chuan a concept kha kan en leh tur a ni. Story nei nge a nih nei lo tihte kha a ni. Story nei a nih chuan an rawn lantir ṭha em tihte pawh thlirna tur a ni ang. An tum dan ang kha music video-ah an rawn tichhuakin, an rawn pholang thiam em tihte kha en tur zinga mi a ni,” a ti.

Mapuia Chawngthu chuan, “Music video chhuakte hi VIFAM member-te kutchhuak a ni hlawm a, chuvang chuan a fair lehzual theih nan keimahni chhungah pawh secret ballot hmangin kan thlang ang,” a ti.

Mizo music video-in hma a sawn nasa tawh hle tih Mapuia Chawngthu hian a sawi. “Kan tih ve ṭan tirh leh tih ve hmate nen chuan a inthlau tawh hle. Khatihlaite kha chuan internet-ah mi tih dan entawn tur emaw, tutorial emaw en tur a la awm lo a, tunah chuan entawn tur tam tak a awm tawh. Chu mai bakah technically-in hma kan sawn nasa hle a, hmanrua kan nei ṭha ta hle a, kan hmanraw neihte pawh kan hmang thiam tawh hle a ni,” a ti.