Comedian Search Third Round ṭan dawn

Double Ess LPS Comedian Search chu Zirtawpni leh Inrinni zan hian Third Round an ti dawn a, nikum lam ang bawkin Zo Zan leh Zo loh Zan te an hmang leh dawn dawn nia hriat a ni.

Kar hmasa Zirtawpni leh Inrinni zan khan Second Round an zo a, chuta tlingte chu Third Round-ah hian an inel ang. Second Round-ah hian contestant-te an cheṭha tlangpui a, mahse thlirtu ṭhenkhat chuan Second Round hian First Round a pha lo deuhah an ngai.

"Kan contestant-te hi an ṭha khawpin kan hria. Beisei pha lo te chu awm bawk mah se a tlangpuia lakin an ṭha ka ti, kei chuan. Ka beisei phak bakin kumin hian an chetha," chief organiser Mapuia chuan a ti. "Selection Round-a rei lo te an inlan bak chu contestant-te hi vawi hnih diat diat an inlan a ni chauh a, an inlan tlem ngaihtuahin an thawm a na ka ti a. An tlangnel telh telh ang a, hma an sawn deuh deuh ang a, Zoram mipui an chawh hlim deuh deuh kan beisei," a ti bawk.

Comedian Search thlirtute chungah Mapuia chuan lawmthu a sawi a, "Beisei kan pha lo ang; chuti chunga he show lo thlirtute chungah hian kan lawm a. Theihtawp kan chhuah ve zel a ni tih lo hria se. Zoram mipui hi nui ila, hlim tlang ila, rilru hah te pawh nui se tih hi kan ngaihtuah a. Kan phak tawk tlem mah se theihtawp kan chhuah ve a ni," a ti.