Sennheiser Top 50-ah Avora an thiam ber

Sennheiser Top 50 intihsiaknaah hian India hi zone hrang hranga ṭhen a ni a, zone tina a thiam berte hi Mumbai-ah hian an inel. North Zone aṭangin Knight Shades chu pakhatna an ni a, East Zone aṭangin Avora Records chu pakhatna an ni a, West Zone-ah The Family Cheese chu pakhatna an ni, South Zone aṭangin When Chai Met Toast te intihsiaknaa inlante an ni.

Ningani zan khan heng, zone tina a thiam berte hi Mumbai-ah an intihsiak a, Mizo band Avora Records chu pakhatna an ni ta a ni. Avora Records hi kum 2013-a din kha a ni a, punk leh indie rock-te hnuhma an music-ah hmuh tur a awm a, jazz leh pop music-te pawh an pawlh mawi thiam viau. Kum 2017 khan MZU Rock Fest-ah pakhatna an lo ni tawh bawk. Single pahnih an tichhuak tawh a, pakhat chu Sides niin, Anna’s Anthem chu an single pakhat dang a ni a, he hla hi VH1 shortlist-ah pawh a tel nghe nghe. An vocalist hi Stephen Rualzakhuma Hnamte a ni a, drummer hi Lalsangzuala, Lalremruata Renthlei chu an guitarist niin, bassist hi Lal­chhuankima a ni.

Avora Records hi pakhatna an nih hian Rs. nuai 20 hu lawm­man, Sennheiser kutchhuak chi hrang hrang an dawng a, chu bakah Sennheiser nen kum hnih chhung an thawk ho ang a, Sennheiser-in kum hnih chhung hi an sponsor dawn a ni. Senn­heiser hi German company a ni a, electronic lam thil siam chhuaktu an ni a, headphone lam chu khawvelin a hriat larna langsar berte zinga mi a ni.