Aziri A rin angin thil a thleng lo! Music video thar a rawn tichhuak ta

‘Eng vangin nge’ hla hmanga Ṭhazual chart-a pakhatna pawh vawi hnih lai luah thei Aziri chung­ah eng thil nge thleng kan hre lo a, a rin ang thil a thleng lo a ni mai thei, ‘Ka rin ang reng i lo ni lo’ tih hla chu music video-a siamin a peih leh ta.

Tunlaia rawn hlawhtling mek Aziri chuan kum­ina a music video pahnihna tur chu a peih leh ta a, he a music video thar tur hi ‘Ka rin ang reng i lo ni lo’ tih a ni. A rin ang lo ni lo chu eng nge ni ang? He hla hi ngaihthlak tluan a chakawm tawh hle a, pakhatna a luahpui leh thei ang em tih chu kan thlir tur a ni.

‘Ka rin ang reng i lo ni lo’ tih hi Aziri’n kumina music video a tihchhuah pahnihna a ni a, music video a tihchhuah tawh hrim hrim pathumna a ni. He hla phuahtu hi Maenga Hauhnar a ni a, music hi EME siam niin, EME-ah hian a record nghal. Video hi Milestone kutchhuak a ni.

Aziri chuan, “Eng vang­in nge’ music video a hlawhtling kha ka beisei ngam loh a ni. Pakhatna hial a luah thei a, kha khan phurna nasa tak leh tumruhna min siam a ni,” a ti. “Tuna mi hi a ṭha thawkhat viau a, a hmaa mi nen khawi nge ṭha zawk ang aw ka hrethiam lo a, kei chuan an ṭha dun ve ve ka ti,” a ti.

Tuna a music video bak hi chu kuminah Aziri music video dang kan hmuh tawh loh a rinawm rih viau. “Kuminah chuan tuna mi bak hi han tih tum ka nei tawh hran lo,” a ti. Kumthar lamahte chuan kan la hmuh belh zel tur­ah i ngai teh ang.