Leonardo-a’n USD mtd 20 pe

Oscar pawh dawng thei khawpa actor hlawhtling, Leonardo Dicaprio chuan environment humhalhna atan a foundation kaltlangin USD mtd 20 a pe chhuak.

Leonardo Dicaprio hian environment humhalhna atan, environment humhalhna kawnga hnathawktu pawl hrang hrang 100 chuangte hnenah USD mtd 20 zet mai grant atan a pe chhuak. Dicaprio chuan, “Ram chhung leh khawvel puma pawl 100 chuangte hnathawh kan pui thei hi ka lawm hle a ni,” a ti. “He pawisa hi kan tuipui te, ramngaw leh nungcha humhalh ngaite kan tu leh fate tana humhalh a nih theih nan te, sik leh sa inthlak thleng do nantea pek chhuah a ni,” a ti.

Leonardo hian kum 1998 khan The Leonardo DiCaprio Foundation a din a, he pawl kaltlang hian khawvel hmun hrang hrangah environment humhalhin hma a la a ni. Climate change chungchangah, “Climate change hi thil thleng tak tak a ni. Tunah a thleng mek a, minung leh thilsiam dangte tana harsatna thlentu lian ber a ni a, hemi titawp tur hian kan thawhho a, kan beih tlan a ngai a ni,” a ti.