MDM-in Fun Day-ah ṭanpuina pe

Music Domain Mizoram chuan Inrinni khan Kelsihah Fun Day hmangin, Kelsiha chhungkaw ṭanpui ngaite hnen­ah ṭanpuina an pe.

MDM hian kum tinin Fun Day hi an hmang ṭhin a, kumin hian awmze nei zawka hmangin, Kelsiha chhungkaw pathumte hnenah, Kelsih Branch YMA kaltlangin, Rs. 5,000 ṭheuh an pe. Ṭanpuina pek inkhawmah MDM president, Tea Boitlung chuan MDM din chhan leh hmasawn dante a sawi a, kum danga member bik tana intihhlimna hun an neih ṭhin chu awmze nei zawk leh midang tana luan chhuahna hun atana hman ṭhaa an hriat avanga he hun hi buatsaih an nih thu a sawi. Fun Day-ah hian MDM member-te leh Kelsih khaw miten intihhlimna hun an hmang.

Fun Day-ah hian MDM YouTube Official Channel kaih­hruaina a siam anga hlawkna têl thei zaithiamte hnenah MDM senior executive, Lalhmachhuana chuan pawisa fai a sem. Tea Boitlung chuan MDM YouTube Official Channel Monetised a nih hnu reiloteah a hlawkna an tel thei nghal chu lawmawm a tih thu leh a thawhpuite inpekna vang a nih thu a sawi. Hneh taka lo thlenga ruai lo buatsaihsaktu Kelsih Branch YMA chungah MDM chu a lawm hle.