Fast & Furious chhungkaw buaina

Fast and Furious 9 tihchhuah hun tur puang tawh mah se, he film kal zel dan turah buaina neuh neuh a awm chho zel a, he film chhehvela thil thleng avangin Fast & Furious changtute an inlungrual ta lo hle.

Vin Diesel leh The Rock te an inhmuthiam lo tih sawi a nih hnuah Michelle Rodriguez a titau ṭep angin a thang a, tunah The Rock leh Tyrese Gibson te ṭawngkamin an inchaltauh leh bawk. Michelle Rodriguez hian hmeichhiate an treat dan a fair lo tiin he film hi chhuahsanah a lo vau tawh a ni.

The Rock leh Tyrese Gibson inchaltauhna hi Fast & Furious beh­chhan film dang siam tum chungchangah a ni. Fast & Furious-a The Rock-a character, Luke Hobbs leh Jason Statham-a chan, Deckard Shaw te chanchin thlur bingna film siam tuma hmalakna a awm a, hemi chung­changah hian Tyrese Gibson hian The Rock hi a chhâng. The Rock hian Instagram-ah a thlalak post-in, a caption-ah ‘Productive meeting leh indawrna lian tak takte chu tunah chuan inchibaina hmanga char hnan a ni ta’ tih a hmang. Hei hi a character chan thlurbingna tur tihfel a ni ta tihna a ni thei mai thei.

Tyrese Gibson chuan comment-na lamah, “Hetiang zawnga i kal lui a nih chuan hmana kan lo neih tawh ṭhin thinlung kha i thlauhthla taah ka ngai. Kan sawi takte kha i hre chhuak leh a nih hma loh chuan i ṭawngka hriat hi ka duh tawh lo. I timeline-a ka rawn luhna chhan hi eng dang vang a ni lo, ka text message i chhan duh ngai loh vang a ni. Fast Family hi chhung­kua kan ni a, a malin ka che ngai lo,” a ti. He comment hi a hnuah a delete leh a ni.