Space-a shooting nei tur Tom Cruise!

American actor Tom Cruise chu space (van boruak) lam film-ah a chang dawn niin Deadline Hollywood chuan a tarlang.

Cruise leh SpaceX chief engineer/designer Elon Musk-te chuan film thar turah hian National Aeronautics and Space Administration (NASA) an thawh pui dawn a, he film thar tur hi action-adventure film lam hawi a ni dawn. Van boruakah shooting an nei dawn tih Deadline reporter Mike Fleming Jr chuan a sawi.

Kum 57 mi Cruise hi a hma pawhin hmun hlauhawm tak takahte film a lo chang tawh ṭhin a, Mission Impossible aṭang khan a hriat theih awm e.

Kum 2011-a Mission: Impossible – Ghost Protocol film-ah khan Cruise hi khawvela inchhawngsang berah a uaithla tawh a, Mission: Impossible – Rogue Nation (2015) leh Mission: Impossible – Fallout (2018)-ahte pawh khan amahin 'stunt' eng emaw zat a lo ti tawh bawk.