Cindy Lalthanpuii Ṭhazual chart-ah a zawna pakhatna vawi li luah thei awm chhun
‘A mawi ber’ hla nena chart-a mawi leh ber Cindy Lalthanpuii chu tuma tluk rual a nih lohzia a lang a, kuminah Hontrade
Ṭhazual Chart-a a zawna pakhatna ni rei thei ber a ni.
Tlangnuam nula Cindy Lalthanpuii chu ‘A mawi ber’ hla hmangin Hontrade Ṭhazual Chart-ah pakhatna a luah leh a, heti hian a zawnin pakhatnaah vawi li a awm ta. Pakhatna dinhmun vawi thum luah thei hi chu kumin chhung hian an awm a, mahse vawi li lai a zawna pakhatna luah thei hi chu Cindy-i chauh a ni. Amtea chu ‘Ka hming a hria’ hmangin pakhatnaah vawi thum a awm a, TBC Zaithanpuia chu ‘Zawh ka zuam lo’ leh ‘Nang chauh i ni’ hlate hmangin pakhatnaah vawi thum a awm bawk. Cindy lehpel tur chuan tih ve fe a ngai tawh ang.
Thingpuisen programme lamah pawh ngaihnawm deuha an kawm, Cindy-i hian Praise On aṭanga hriat a hlawh hnuah Tlangnuam, Aizawla an KṬP Branch hruaitute chungah a lawm hle. Kawng engkimah amah an pui a, zai tura an sawmna hmun hrang hrangah live music-a remsak turin an zui ṭhin. Heng zawng zawngah hian Cindy hi an vengte chungah a lawm hle.
Cindy hian music video siam hmabakte pawh a nei a, chung zingah chuan Praise On laia a sak ‘Phal mai rawh’ tihte pawh a tel. Cindy hian engtikah nge hma a lak ang tih a la sawi thei lo. Tunhnai lawk khan an college, Pachhunga University College chuan music video an siam a, hetah hian Cindy-i hi a tel ve nghe nghe.
Mizo Idol aṭanga Zoram pumin kan hriat, Grace Lalchhanhimi chu pahnihnaah a rawn kai chho a, a hla ‘Rawngbawl tura chhandam’ chu a hmain pathumna a ni. Pahnihnaa awm TBC Zaithanpuia hla ‘Min ngaidam rawh’ tih chu pathumnaah a chhuk thla thung. Hontrade Ṭhazual Fakna chart-ah hian chhuak leh lut thar an awm lo.
Hontrade Ṭhazual Fakna
1 Cindy Lalthanpuii - A mawi ber
2 Grace Lalchhanhimi - Rawngbawl tura chhandam
3 TBC Zaithanpuia - Min ngaidam rawh
4 Judith - Ka lungawi e
5 David Vanlalpeka - Lalpa’n a sawm a che
6 One in Christ - Ka Lalpa Lalram
7 Temii Sailo - I thiam an hril
8 Amtea - Ka hming a hria
9 Sawmtea - Hlimin ka zai
10 Vohbiki - Fakna sang ber