LBS Kia-in lirthei hralh chhuak ṭan

LBS Group hotunu T Zosangpuii chuan nimin khan Mizorama Kia dealer an nihna chu Pathian hnenah hlanna neiin mipui dawr theih turin showroom leh servicing station a hawng.

LBS Kia hian nimin aṭang khan car an hralh chhuak nghal a ni. LBS Group hian Mizorama Suzuki two-wheeler dealer an nihna an hlawhtlinpui mek a, Dealer Principal H Ngurdingliana Ngurte chuan Pathian malsawmna dawnga Kia dealership an hawn theih avangin LBS chhungkua an lawm hle a, Mizo mipui tan a ṭha thei ang bera enkawl ngei an tum tih a sawi.

Kia hi South Korean car manufacturer niin kum 2019 khan India ramah an car an rawn zuar chhuak ṭan a, kum thum tlin hmain lirthei 5,00,000 an hralh hman a ni. India ramah hian car chi hrang panga - SUV pahnih Seltos leh Sonet, multi purpose vehicle pahnih tho Carens leh Carnival bakah electric vehicle EV6 an tichhuak tawh a; hengte hi LBS Kia aṭanga lei theih tura chhawpchhuah a ni nghal bawk.

LBS Kia hian Mizoramah beiseina an nei sang a, dealership hawn a nih hma pawhin ngaihventu an tam hman hle a, staff pawh 40 chuang vel an ruai nghal a ni.

Showroom hi Falkland, Aizawlah awmin servicing station chu Brigade Veng, Bawngkawn, Aizawlah a awm thung.