Deadpool 3: Hugh Jackman Wolverine a lo kir dawn e

Ryan Reynolds chuan social media kaltlangin Deadpool 3 chungchang a puangzar a, internet khawvel lama a hmelma (fiamthuin) Hugh Jackman pawh he film-ah hian a Wolverine thuam nen a inlan dawn.

Social media platform hrang hranga video a post-ah Ryan Reynolds chuan D23 a awm thei lo tur chu pawi a tih thu a sawi rualin Deadpool film thar tur atan rei tak chhung rim takin an thawk tawh tih a sawi. Deadpool film thar tur chu an duh uluk bawk si avangin ngaihtuahna (idea) pawh an nei lo hle tih a sawi a, mahse pakhat erawh an neih thu sawiin chutihlai chuan a hnungah Hugh Jackman lokal tlang chu biain Wolverine lema vawi khat chan leh a duh leh duh loh a zawt a, Jackman chuan a duh thuin a lo chhang a ni.

Deadpool 3 hi September 6, 2024-ah tlangzarh a ni dawn tih a chiang tawh a, 'Free Guy' leh 'The Adam Project'-a Reynolds-a'n a lo thawhpui tawh Shawn Levy chu director tur niin Deadpool 3 hi chu MCU khawvelah chan a ni tawh dawn a, chu chu a tiphurawmtu tur pawh a ni. Deadpool film hmasa ziaktu Rhett Reese leh Paul Wernic-te bawkin script an ziak leh dawn bawk.

Hugh Jackman 'Wolverine' kan hmuh hnuhnun ber chu kum 2016 kha niin 'Logan'-a a inlan bak kha chu Wolverine lemah hian a chang leh tawh loa, kha film tawpah khan an thihtir nghe nghe a nih kha. Chuvang chuan eng ang takin nge Deadpool 3-ah a inlan dawn tih hriatthiam a har hle.