Billboard Album chart-ah BLACKPINK 'Born Pink' No.1

Blackpink chuan Billboard chart-ah mellung pawimawh tak an phum. A vawi khatna turin khawvelin rimawi chart a ngaihven Billboard 200 chart-ah topper an ni.

An album thar ber 'Born Pink' chu Billboard 200 chart-ah pakhatna an nihpui a, 102,000 equivalent album units hmu chhuakin kum 2008 hnua hmeichhe hlang awmna group Billboard 200 chart-a topper ni leh thei hmasa ber an ni bawk. Top 10-ah chuan a hma pawhin an lang tawh a, 'The Album' kha pahnihna hial nihpui mah se chart chung berah erawh an la chuanpui lo thung.

Heti hian Blackpink hi South Korean act zinga Billboard 200 chart topper ni thei pathumna an ni chiah a, BTS leh Stray Kids-te huangah an hming ziah lanin a awm ve thei ta a ni.

Single-a an tihchhuah 'Shut Down' chu Billboard Global 200 leh Billboard Global Excl. US chart-ahte pakhatna nihpui bawkin Artist 100 chart-ah anmahni hi pakhatna an ni mek bawk.

Harry Styles pawhin record a siam e
US Box Office lamah a film channa 'Don't Worry Darling' chu pakhatna a ni mek a, chutih rual chuan a hla 'As It Was' chu Billboard Hot 100 chart-ah a kar 15-na atan pakhatna a nihpui ve leh bawk. Heti hian Styles hian British act zinga Hot 100 chart-a pakhatna ni rei/zing ber record a siam chiah a ni.

Hot 100 chart history-ah hrim hrim pawh 'As It Was' hi chart topper ni rei pawl a ni tawh a, 'Old Town Road', 'Despacito' leh 'One Sweet Day' chiah a tluk tawh lo.