Ṭhazual Awards 2017 Best Female Artist bihchianna
DJI, Feli Fanai, Mimi Renthlei, Rachel Lalnunkimi leh Zorinzuali Khiangte te hi tunlai Mizorama lengzem huang chhungah chuan anni bak an awm chuang lo ti ila kan sawi sual lutuk lo ang. Mipuia huhang an neih dan te, an hlain thlan a hlawh dan aṭangte hian anni hi a awm ber ber zinga mi an ni.
Ṭhazual Awards sem turah Best Female Artist category-ah DJ Lalvenhimi, Feli Fanai, Mimi Renthlei, Rachel Lalnunkimi leh Zorinzuali Khiangte te kan hmu. DJI hi Ṭhazual chart-ah pawh a dinhmun a sang a, pakhatna luah fotu a ni tih kan hria. Tunhnaia a hla thar ‘Ka tan i chuai’ pawh pakhatna a thleng thei. Kum 2015 khan DJI hian Best Female Artist hi ‘Liam mai rawh’ hmangin a lo la tawh a, nikum khan a la tawh bawk a, kumina a lak leh chuan vawi thum a dawnna a ni tawh dawn.
Feli Fanai hi tunge a nih kan hria. Tuna a hla thar ber ‘Pheichheh mawi i khai ang’ tih chu Ṭhazual chart-a a vawi khat lannaah pathumna thleng nghal thei khawpa hla hit a ni. Hetiang taka hit nei thei zaithiam hi a neu theih loh hrim hrim. Ani hian Ṭhazual Award a la dawng lo a, amaherawhchu nominee-ah chuan kan hmu ṭhin a, kumin hian Ṭhazual Awards-ah hniak lian tak a hnutchhiah ang em tih chu mi thlir a ni. Mimi Renthlei hi kan hria a, kum eng emaw chen album a tihchhuah tawh loh hnuah nikum khan ‘Run rem ang aw’ album a tichhuak a, a single ‘Hrilh a’n ka mawi si lo’ tih chu Ṭhazual chart-ah pakhatna luah thei khawpa hla ṭha leh nalh a ni.
Mizo Idol aṭanga kan hriat Rachel Lalnunkimi hian nikum khan ‘Ka phur zo lo’ hla hmangin Ṭhazual lengzem chart-ah pakhatna a lo luah tawh a, chart-a a lan hma, kum 2015-a Mizo Idol aṭang ringawt pawh khan he nu zaithiamzia hi kan hre tawh a, he category-a a awmpuite tan pawn huphurhawm a tling. Zorinzuali Khiangte hi tunhnaiah hla hit a rawn nei mawlh mawlh kan ti thei ang. Ṭhazual Awards-ah nominee-ah pawh a vawi khat lanna a ni. Michael M. Sailo nena an sak dun ‘Ka ngaidam che’ tih chu pakhatnaah vawi hnih a awm thei a, Ṭhazual chart tihchhuah hnuhnun ber, lengzemah khan ‘Lunglen a na’ hla hmangin pakhatna a luah bawk.