Lalenkawli Pautu Album thar a tichhuak

Lengzem leh leng­lawng lama Zoram pumin kan hriat lar, Lal­enkawli Pautu chuan nizan khan lengzem album thar a tlangzarh a, he album hi ‘Awmhar lunglen’ a ni.

Lalenkawli Pautu album thar ‘Awmhar lung­len’ hi Mizo lengzem hla hlui, chuai thei lo leh mite thinlunga thu sawi reng ṭhin, Mizo hla ṭha dahkhawmna a ni. He album-a hla awm zingah ‘Lenlai a rual lo’, ‘Tleitir­ah tleitiri’, ‘Ṭha mam’, ‘Enga’n ka lo tawn che’, ‘Aw min hrilh rawh zaninah nge’ tih leh hla dang, a vaiin hla 19 a awm.

Tuna mi hi Enkawli lengzem album pathumna a ni. Kum 2014 khan ‘Di biahzai’ album a tichhuak a, Lelte Awards-ah he album hmang hian Album of the Year a la nghe nghe. Nikum khan ‘Zunleng ngaih’ album a tichhuak leh a, Lelte Awards hnu­hnung berah Enkawli hian Singer of the Year a la bawk. Hetianga zaithiam hlawhtling leh huhang nei hi a ni.

Kolasib chhuak, pasal a neih hnua Lungleia awm ta Enkawli Pautu hian album tihchhuah hmabakah pawh a la nei. Album tihchhuah hmabak a neih zinga mi pakhat hi Mizo hla phuah thiam lar, Liandala hla phuahte khung­khawmna tur a ni dawn a, a hlu hle ang. Pakhat pawh hi lenglawng leh lengzem lam pang a nih leh hmel a, nghahhlelhawm, mi lunglengte inhnangfakna tham a ni leh ngei ang.