Box office-a film tharin ro a rel

‘It’-in North America mipuite hlauthawnga a awmtir hnuah Kingsman: The Golden Circle film a rawn chhuak a, hmun hniam zawkah a tawlh thla. Kingsman: The Golden Circle hian kar tawp ni thum chhung khan sum lalut hnem berin, North America box office-ah pakhatna a luah.

Kingsman: The Golden Circle hian kar tawp ni thum chhung khan USD mtd 39 a lalut a, a hmaa mi ai chuan a hlawhtling zawk. Kum 2015-a tihchhuah, a film hmasa, ‘Kingsman: The Secret Service’ khan opening week-ah USD mtd 36.2 a lalut. The Golden Circle hian khawvel hmun dangah pawh USD mtd 61.2 lalut tura ngaih a ni. Ram 55 laia chhuah a ni.

‘It’ film-in sum a la lalut hnem hle tho a, USD mtd 30 lai a lak belh leh. Sum a hmu hnem ve tawh hle a, ni 17 chhuah a ni tawh a, a sum lakluh tawh zawng zawng hi USD mtd 266.4 lai a tling tawh.

“The Lego Ninjago Movie” a che ṭha hle tura ngaih beisei a pha lo hle. Sum lakluh hnem lamah pathumna a ni chauh a, USD mtd 21.2 a lalut. He film siamtute chuan USD mtd 30 vel lalut tura ngaih a ni. A hmaa lego film chhuak tawhte ngaihtuah phei chuan a che chhe hle. A hmasa ber, The Lego movie khan USD mtd 69.1 a lalut a, a hnua mi, The Lego Batman Movie khan USD mtd 53 a lalut.

Box office movie

“Kingsman: The Golden Circle” - $mtd 39

“It” - $mtd 30

“The Lego Ninjago Movie” - $mtd 21.2

“American Assassin” - $mtd 6.3

“Home Again” - $mtd 3.3

“mother!” - $mtd 3.3

“Friend Request” - $mtd 2.4

“The Hitman’s Bodyguard” - $mtd 1.8

“Stronger” - $mtd 1.7

“Wind River” - $mtd 1.3