Sofia Vergara TV actress sum lalut hnem ber

Forbes chanchinbuin TV actress sum lalut hnem a tarlang leh a, tudang ni loin, sum lalut hnem ngai bawk, Sofia Vergara chu sum lalut hnem ber a ni leh. Vergara hi a kum zawna kum ruk chhung TV actress sum lalut hnem ber a nihna a ni.

A sum lakluhna langsar leh hlun chu kum 2009 aṭanga a channa, Madea Goes to Jail a ni a, he TV film-ah hian episode tinah USD nuai nga a hlawh. Hei bakah hian Emoji Movie-a a chan aṭang khan sum a lalut hnem viau a, chubakah chuan sumdawnna kaihhnawih thil hrang hrang aṭangin sum a lalut bawk. Sumdawnna kaihhnawih aṭanga a sum hmuhna lian chu Head & Shoulders tan an thupuangtu a ni a, Covergirl Cosmetics faknaah te, gym faknaah te, furniture hrang hrang, supermarket leh restaurant fakna hrang hrangah te a lang. Heng zawng zawng aṭanga kum khat chhunga a sum lakluh chu USD mtd 41 zet a ni.

Sum lalut hnem pahnihna chu Big Bang Theory-a mi, Kaley Cuoco a ni. A sum lakluh zawng zawng hi USD mtd 26.5 a ni a, nikum aiin a sum lakluh hi USD mtd 2 zetin a pung. A sum lakluhna lian ber chu The Big Bang Theory hi a ni a, he TV film-a episode pakhat zelah USD mtd 1 zet a hlawh.

USD mtd 13 lai lalutin, Minda Kaling chu sum lalut hnem pathumna a ni. The Mindy Project kha a hlawhtlinpui a, mahse a tawp ta. Chutihrual chuan movie lama a channa Oceans 8 te, A Wrinkle in Time te chu a chhuak hnai a, NBC series, Champions chu buaipui mek a ni leh bawk.

Ellen Pompeo chuan USD mtd 13 tho a thawk chhuak a, Mariska Hargitay chuan USD mtd 12.5 lalutin, Julie Bowen chuan USD mtd 12 a hlawh chhuak bawk. USD mtd 11 thawk chhuak thei Kerry Washington chu pasarihna a ni a, Indian actress, Priyanka Chopra chuan USD mtd 10 thawk chhuakin pariatnaah a lang pha. India leh US aṭangin sum a lalut hnem hle a, US lamah chuan Quantico a hlawhtlinpui a, Baywatch siam thar leh turah a chang dawn. Robin Wright chuan USD mtd 9 thawk chhuakin pakuanaah a lang a, Pauley Perrette chuan USD mtd 8.5 lalutin 10-na a ni.

An sum lakluh hi kawng hrang hranga chhut a ni a, sum an lakluh zat tarlan hi an senso paih hma a ni. Sum an lakluh aṭang hian chhiah an la pe leh ang a, agent-te fee te, manager leh dan hremi an rawihnate an la paih leh chuan an sum lakluh tak tak chu a tlem ve kuar ang.