Hriselna atan Yoga a him tâwk lo!

Therapeutic technique lama chanchinbu hriat hlawh, mithiamten an zirchianna chi hrang thu an ziahna, Journal of Body­work and Movement Therapies-a University of Sydney, Australia mithiamte zirchianna tihchhuahah chuan Yoga hi mihring hriselna atan a him tâwk lo tih tarlan a ni.

Journal of Bodywork and Movement Therapies-a thuchhuah, Times of India-in a tarlanah chuan Yoga hi kan insawi hmuh leh hriat angin mihring hriselna atan a him tâwk lo a, na neih sate pawh a tizual thei a ni.

Yoga hi khawvel pum­ah musculoskeletal enkawlna lar tak a ni a, khawvel pumah makta­duai chuangin Yoga hmang hian tihrawl, ruh leh rilru sawizawi nana an hman mek a ni. University of Sydney-a mi, Evangelos Pappas chuan, “Yoga hi exercise dang ang bawka musculoske­letal na enkawl nana hman a ni a, chutihrual chuan musculoskeletal natna a thlen thei bawk,” a ti.

“Kan zirchianna aṭang hian kum tin, yoga avanga natna nei hi yoga ti ṭhin zaa 10 chung lam an awm tih kan hmu a, chu chu sport leh exercise dang ti ṭhinte zinga an tih ṭhin avanga natna nei awm ang zat lai a ni tho mai,” a ti. “Na nei sa tan phei chuan a tihnat zual phah thei a ni,” a ti. “Yoga tih hmaa na nei sa zaa 21 zet chu yoga an tih hnuah an na a zual phah a, a bikin bân bula na nei sa an nih chuan yoga an tih zui avanga an na a zual theihna chance a sang hle a ni,” a ti.