Vawiin aṭangin Jazz Festival ṭan tawh dawn
Vawiin hian 1st Aizawl International Jazz Festival chu ṭan a ni tawh dawn a, chhun lamah workshop a awm ang a, zanah concert a awm thung ang. Zan concert-ah hian luh man a awm dawn lo.
1st Aizawl International Jazz Festival hmang hian Israel ram aṭangin Yogev Shetrit Trio chu an rawn kal a, anniho hian vawiin chhunah, Chanmari YMA Hall-ah workshop a awm ang a, zan lamah concert neih leh tur a ni.
He festival hi Indian Council for Cultural Relations (Ministry of External Affairs, Govt. of India) buaipuiin, Aizawl Jazz Academy leh Art & Culture Dept., Mizoram ṭangkawpte buatsaih a ni. Vawiin chhun dar 12 hian Chanmari YMA Hall-ah workshop neih a ni ang a, zan dar 7, Chanmari YMA Hall-ah vek hian concert neih a ni dawn. Concert-ah hian Yogev Shetrit Trio hi an che ang a, anni bakah tualchhung zaithiamte an zai ang a, zaipawl zai leh band te zai ngaihthlak tur a awm ang a, cultural troupe te pawh a awm ang.