'BAHHNUKTE' Mizo film thar a hnai e

Mizo lemchanthiam Adama leh Hruaia Sailo-te channa film 'Bahhnukte' chu tihchhuah a ni ṭep e.

He film hi kum 2019-a Hyundai in Hyundai Car neitute tana article inziahsiak a buatsaiha lawmman pakhatna latu PL. Lalmuankima, Pangzawl ziah 'Ka ngaihtuah hlimna chu' tih zulzuia siam a ni a, chuvang chuan belhchian a dawl dawn.

Production pawh CK Hyundai-in buaipuiin tunah hian shooting an nei zo tawh a, editing lam khawih mek niin rei loteah tlangzarh hun an tichiang thuai dawn a ni.

Samie Pachuau chu director niin Director of Photography-ah BS Pictures (Lalbuatsaiha) te an ni bawk. Samie Pachuau hi Scooty, Nunna Thar leh Norah vela kan hmuh tawh lemchanthiam kha niin tunah hian a kut chhuak film kan hmu dawn thung. BS Pictures lam hi chu sawizau vak ngai loin an kuthnu a mawi ṭhin tih kan hriat kha.

Adama leh Hruaia-te hi achangtu ber an ni dawn a, Mizo film danga kan hmuh tawh ṭhin Sangteii Renza, Maruata Rawite, Kima Parousia leh Lalrinmawia te chu inlan tur zingah an tel a, anni bakah hian zaithiam, lemchan khawvela kan la hmuh ngai loh Jerry-a kan hmu dawn bawk a, Dj Lalvenhimi pawh achangtu zingah a tel dawn bawk a ni.