Gangsta's Paradise 'hitmaker' Coolio a thi

US rapper Coolio, 'Gangsta's Paradise' larpuitu chu kum 59 mi niin a thi.

A ṭhian hnai tak leh a manager ni bawk Jarez Posey chuan Coolio thih chungchang hi puangzarin Los Angeles-a a ṭhiante inah bathroom chhuatah nikhaw hre loa hmuh a ni tih a sawi a, Nilaini chawhnu lamah khan a thi tih a sawi.

90's rapper lar Coolio hi 'Gangsta’s Paradise' leh 'Fantastic Voyage' avangtein hriat a hlawh hle a, kum 1994 leh 2009 inkar khan studio album pariat tichhuak hmanin lemchan lamah pawh sulhnu a hnutchhiah ṭha hman hle. Kum 1996 khan 'Gangsta's Paradise' chu Grammy Awards-ah Best Rap Solo Performance award a dawnpui a, MTV Video Music Awards pathum a dawng tawh bawk.

Coolio hian record maktaduai 17 chuang a hralh hman a, 'Gangsta's Paradise' music video khan YouTube-ah thlirtu tluklehdingawn chuang a nei tawh bawk a ni.

Los Angeles Fire Department chuan Nilaini tlai dar 4 khan call an dawn thu sawiin, call an dawnna hmun an va thlen chuan nikhaw hre loa a lo awm tawh thu leh minute 45 vel an bawihsawm hnuah tlai dar 5-ah thia puan a ni ta tih an sawi. A thih chhan tak hi he thu ziah lai thleng hi chuan puanzar a la ni loa, mahse paramedic-te chuan cardiac arrest vang a nih an rin thu an sawi.

Coolie hi a hming tak chu Artis Leon Ivey Jr a ni a, a thih thu puanzar a nih rual hian milar tam takin social media lamah an ui thu an tarlang nghal a ni.