Taylor Swift-in album thar 'Folklore' a tlangzarh Music Video thar a tichhuak bawk

Billboard Woman of the Decade Taylor Swift chuan nimin khan album thar 'Folklore' a tichhuak a, BBC leh Billboard pawhin 'Folklore' chungchang an ziahnaah hian an fak mawi nghal hle. 'Folklore'-a hlate hi Covid-19 hripui leng kara a phuah leh a record-te a ni hlawm. 

April thla khan Swift hian Instagram-ah thlalak post-in a caption-ah engmah thil thleng langsar a awm loh thu tarlang mah se kar 12 hnuah chuan album thar hlak hi a rawn peih der a, hla phuah awlsam ve tak Taylor Swift hian inkhunghran hun hi a hmang ṭangkai tih a hriat.

Mahnia inkhunghran avangin a ngaihtuahna a kal kual nasa hle tih Swift hian tarlangin pen huma a suangtuahna, a hunkal tawh leh a hriatrengna kawmte chu hun khawhralna atana a hman thu a sawi. A album thara hlate a puitlin theihna atan hian American indie rock band The National guitarist Aaron Dessner leh Jack Antonoff-te'n an pui nasa hle a, hla pawh hi an phuahpui hlawm nghe nghe. Track pakhat 'Exile'-ah chuan Bon Iver a thawhpui bawk a ni.

Taylor Swift hi rimawi khawvelin a hmelhriat tirh aṭangin a lar a kaltluang hle a, chanchin chhia liantham sawi tur a neih meuh loh bakah a album tlangzarh leh hla thar tihchhuah apiang a hit em em vek a, Billboard Woman of the Decade a ni thei pawh hi a awm hle. 

International Federation of the Phonographic Industry pawhin ṭum hnih ngawt  Global Recording Artist of the Year-ah a thlang tawh a,  American Music Awards-ah pawh  Artist of the Decade hial dawng thei a ni a, a album tihchhuah thar pawh hi hralh a kal leh hle ang tih a chiang nghal. 'Folklore' album-ah hian track 16 awmin bonus track pakhat a awm bawk a ni. Heng hlate hi lyric video a tichhuak nghal hlawm a, YouTube-ah a dah nghal hlawm bakah streaming platform hrang hrangah ngaihthlak theihin a awm tawh bawk.

Music Video thar 'Cardigan'

Taylor Swift hian a album thara mi track pakhat 'Cardigan' music video chu nimin khan a tlangzarh nghal bawk a, he music video-ah hian Swift hi director a ni nghal bawk. 'Cardigan' music video an shoot lai hian medical inspector-in an enpui reng tih sawiin, hmai an tuam vek bakah midang hnaihah an awm lo tih a sawi bawk. A sam siam, makeup leh styling-te pawh amahin a inbuaipui vek a ni. Video hi YouTube-ah chuan darkar li chhungin mi maktaduai hnih chuangin an thlir hman.