Paramore-te'n album thar 'This Is Why' tichhuak dawn

Kum nga chuang album thar an tihchhuah tawh loh hnuah leh hun eng emaw chen band anga an kal loh hnuah Paramore chuan album thar 'This Is Why' an tichhuak dawn tih an puangzar.

Hayley Williams, Zac Farro leh Taylor York-te chuan band anga chawlh lailawk an neih chu titawpin Nilaini khan hla thar 'This Is Why' an tichhuak a, hei hi an studio album thar tur title track a ni nghal bawk.

Paramore hian an album thar hi nakkum February 10-ah hian an tlangzarh dawn a, Atlantic Records kaltlangin an tlangzarh dawn a ni.

Paramore hian kum 2017 khan an album hnuhnung ber tichhuakin hemi hnu hian thawm lian tham an nei zui lutuk ta lo. September 2018 hnu lamah phei chuan band angin an la inlan ho leh lo a, an reh hlen dawn emaw tih hnuah kumin January thla khan album thar buaipuiin studio an lut tih thawm a awm a, tunah chuan hla thar hial pawh an rawn tichhuak leh ta a ni. October 22 hian When We Were Young festival, Las Vegas-a neih turah My Chemical Romance-te nen show headline an ni ho dawn a, hei hi September 2018 hnua band anga live-a an inlan leh hmasak ber tur a ni dawn.