Sawmtea Chhangte MV thar YouTube-ah

Mizo Gospel singer sawm hlawh em em reng mai Sawmtea Chhangtea chuan hun rei tak chhung music video a tihchhuah tawh loh hnuah music video thar 'Nazareth Tlangval' nen a lo kir e.

Sawmtea hian music video hi a uluk ṭhin bawka, thlira ngaihthlak a manhla ṭhin hle. Tuna a tihchhuah thar pawh hi mi tam tak mit leh beng titlai tur tak a ni.

'Nazareth Tlangval' hi Valtea Khiangte phuah a ni a, music chu Valtea leh PB Lianhminga kut chhuak niin recording chu Foster records lama a tih a ni a, video chu BS Pictures kut chhuak a ni thung. A music video hmuh tinuam zual turin Mizo Dance Camp-te chu an inlan bawk.

Sawmtea chuan, "Pathian zarah programme atam avangin duh ang hunah video ka siam thei lo zel a, tuna mi pawh hi theihtawp chhuahin kan sual chhuak ve ta a, a hlu hle a ni. Min duhsaka min ṭawngṭaipuitute chungah lawmthu ka sawi mawlh mawlh," tiin a sawi.

A hla thar hi MDM Library lamah a dahlut tawh a, Zonet Cable TV lamah chuan pho chhuak tawhin zanin dar 7 hian YouTube lamah en theihin a dah chhuak ve leh dawn a ni.