Playboy dintu Hefner a thi

Entertainment khawvela hriat hlawh, putar tak a nih thlenga entertainment khawvela huhang ngah leh mi ropui, Playboy dintu leh Playboy chanchinbua editor-in-chief ni mek Hugh Hefner chu kum 91 mi niin a thi.

Hugh M. Hefner hian kum 1953 aṭang khan Playboy chanchinbu a tichhuak a, he chanchinbu hi tun thlengin US leh khawvel pumah chanchinbu hralh tla leh lar a ni. Kum 1926 April 9 khan Chicago, Illinois-ah a piang a, kum 1953 khan USD 8,000 pûkin, Playboy chanchinbu hi a chhuah ṭan. Ama kutkawih leh thawhchhuah liau liauin mi ropuiah a insiam a, a thih hian a hausakna hi USD mtd 43 zet a tling tawh a ni.

Mothodist Kohhran ruh tak aṭanga chawr chhuak Hefner thih chhan hi chiang taka sawi a ni lo a, awmlaia thi a ni a, thlamuang takin a chawl ta tiin a chhungte chuan an puang chhuak.