Best Male Artist Lengzem Panga aṭanga thlan chhuah bik tur chu!

Ṭhazual Awards Best Male Artist (Lengzem)-ah hian C. Sanga, F. Zomuanpuia, Mathlenga, Thangromawia leh Thiamchantira te an awm. Chart-a an hnuhma a ṭha hlawm vek a, zaithiam lamah pawh a thiam fal nalh an awm chuang lo. Heng mi panga aṭang hian a ṭha ber thlan chhuah tur a ni dawn a, a thlangtu turte tan pawn luhaina tham a ni. C. Sanga hi a kum lamah senior tawh mah se, lengzem huang chhungah chuan a vanglai a la hmang mek. Ṭhazual chart-ah pawh pakhatna a lo luah fo tawh a, kuminah ‘Lungrunpui’ hmangin chart-ah kan hmu a, pathumna hial a thlenpui thei. Mipa zinga chart-a pakhatna luah ngun berte zinga mi a ni.

F. Zomuanpuia pawh hi kan hriat lar sa a ni. Ṭhazual Lengzem chart tihchhuah hnuhnung berah khan ‘Ka thai mampui’ hla hmangin paruknaah a lang. Ani hi kum 2015 Mizo Idol aṭanga kan hriat lar tawh kha a ni a, khami hnu khan music video pawh a tichhuak nual tawh a, chart-ah pawh a mikhual lo. Mathlenga hi Mizo Idol aṭanga kan hriat bawk, tun thlenga hlawhtling mek a ni. Kuminah pawh ‘Zawlkhaw dingdi’ hla hmangin pakhatna vawi hnih a luah thei a, tunah hian a hla ‘Di ngaih’ chu top 10-ah a lang mek.

Leihkapui zai hmanga Mizote lunglen hnemtu Thangromawia hi tunhnaia lo zawhnaa an zai mai mai pawh en a hlawh hle a, hei hian a zaithiamzia a tarlang. Nikum khan ‘Chhing mitin’ tih hla hmangin chart-ah pakhatna pawh a lo luah tawh a, ani hian Best Male Artist hi dawng mah se, a awm lo ti an awm chuang lo ang. Zo rimawi khawvela hnuhma nei ṭha leh talent nei ṭha Thiamchantira hian record a nei ṭha hle bawk. Ṭhazual chart-ah pakhatna a luah fo a, chu mai bakah hla phuah a thiam a, a hla phuahte hi zaithiam lar dangte pawhin an saksak fo. Ṭhazual Lengzem chart hnuhnung berah khan ‘Kir an rel lo’ hla hmangin palina lai a luah mek.