Zaninah 'ROPUI KHAWP MAI'

A hun a thleng dawn ta! Zanin hian Zephyr Drama Club chuan an drama thar 'Ropui Khawp Mai' chu Dawrpui Multipurpose Centre-ah an chang dawn.

'Ropui Khawp Mai' hi live show tur niin TV leh hmun dangah erawh zanin hi chuan pek chhuah a ni dawn loa, en duh tan chuan Dawrpui Multipurpose Centre pan a ngai dawn a ni. Seat a tam loa, ticket a hmunah tlem azawng lei tur erawh a awm dawn a, ticket a tam tawh loh avangin a hmuna leichawp i tum a nih chuan i kal hma deuh erawh a ngai ang. Ticket hi Rs. 500 man a ni a, Zephry Drama Club duhsaktute tan chuan Rs. 1,000 man pawh a awm a ni.

Social media lamah teaser an tichhuak zeuh zeuh tawh a, chuta ṭang chuan en chak an tam tih pawh a chiang. Zirtir nei ṭha tak show a nih leh ngei hmel a, thlirtute tihhlim paha zirlai ṭha tak zir chhuahtir hi Zephyr Drama Club kalphung a ni reng ṭhin a, tunah pawh chutiang show chu kan hmu leh dawn niin a lang. Kan hmelhriat sa tawhte bakah hmel thar pawh kan hmu dawn a nih hmel bawk.

A hmuna i kal ve hman loh vangin lo beidawng mai lo la
'Ropui Khawp Mai' hi a hmuna i en ve thei lo emaw, ticket i chang hman lo emaw a nih pawhin lungngaiin lo indawm kun mai lo a, i tan kawng dang hawnin a awm dawn a nia.

October 7 aṭang hian Runmawi Apps-ah an dah chhuak dawn a, man tlemte chawiin a duh tan chuan a en theih dawn a ni.