SSU-in Self-Support Award hlan

Students’ Self-Support Union(SSU), General Headquarters chuan zirlai mahni intodelhte hnena Award an pek ṭhin Self-Support Award chu Ningani zan khan Ignite Studio Khatla-ah a hlan. He hunah hian John Lalpeka, 3:16 Plan Solution chu Khuallian niin Jeje Lalpekhlua, Footballer Khualzahawm a ni.

Award hi mi pathum hnenah an hlan a, pawisa fai Rs 10,000 leh Citation bakah lehkhabu rotling tak tak a keng tel a ni. Self-Support Award hi Ramthanpuia, Govt. T. Romana College; Julie Lalrinpuii, Govt. Hrangbana College leh F. Lalremkima, Govt. Johnson College te’n an dawng.

Ramthanpuia hi Serhmun khua niin, Class XI a nih lai aṭanga intodelh niin zirna kawnga a intodelhna tur hian a rem rem thawkin cement work, pickle zawrh leh Two-Wheeler taxi khalhte'n a inhlawh ṭhin a, tunah hian BA a zo chiah a ni.

Julie Lalrinpuii hi Venghlui, Aizawl-a khawsa, Govt. Hrangbana College-a 5th Semester zir mek a ni a, class kal chungin cake-te a ur a, perfume leh thawmhnaw hmang tein a sumdawng bawk. Admission fee leh exam fee zawng zawng a intodelh vek a, Class IX a nihlai aṭang tawhin a intodelh tawh a ni.

F. Lalremkima hi chhungkaw khawsak pangngai tak, Electrician pension pa leh Group A Officer nu nei chunga Class XII a zir lai aṭanga chhungte tibuai lova intodelh a ni a. Visual art, dentist assistant, receptionist, cement work leh a rem rema inhlawhin chhungte tibuai loin a zirna atana mahni intodelh a ni. Govt. Johnson College-ah 5th Semester BA a zir mek.