Ram 71 zingah Mizo an sang ber

Mizo K-pop group, Immortals Army chu Changwon, South Korea-a K-Pop World Festival 2017-a intihsiakah pakhatna an ni.

Immortals Army-ah hian mi pasarih awmin, mipa vek an ni a, India ram aiawhin an tel a ni. An inelnaah hian ram hrang hrang aṭangin group 12 an tel a, pakhatna an nihna hi làm, K-pop dance-ah a ni.

Inelnaah hian khawvel ram 71 aṭangin group an tel a, chuta ṭang chuan Immortals Army-te bakah, Nigeria, Russia, Madagascar, Malaysia, USA, Vietnam, Singapore, Indonesia, Canada, Turkey, Peru leh Hungary aṭanga group telte’n final round an lut a ni.

Immortals Army-te hian K-pop band BTS hla - ‘Blood, Sweat and Tears’ sain an lám a, pakhatna an nihpui ta a ni. Lawm­manah dollar 7,000 an dawng a; lawmman hi K-pop girl’s band Twice-in an hlan.

Immortals Army group member-te chu - Vanlalṭanpuia, Vanlalruata, Lalṭanpuia, Zothantluanga, Vanlalhruaia, Zomuansanga leh Lalrammawia te an ni.

K-pop World Festival 2017 hi kum tin neih niin, music & dance competition a ni a, kum 2011 aṭangin South Korea sorkara Ministry of Foreign Affairs-in an buatsaih ṭhin.