P. Diddy aia hausa an awm thei lo

Hip-hop khawvelah chuan P. Diddy aia sum lakluh thiam leh hausa hi an la awm thei lo a ni ber mai. Forbes chanchinbuin Hip-Hop artist sum lalut hnem a tar chhuah tharah P. Diddy bawk chu sum lalut hnem ber a ni leh.

Hip-Hop aṭanga khawvelin a hriat lar, P.Diddy chu Forbes-in Hip-Hop star sum lalut hnem a tar chhuahah pakhatna a luah leh a, nikum pawh khan pakhatna bawk a ni. Kum khat chhunga a sum lakluh zawng zawng hi USD mtd 130 zet a tling. Nikum khan USD mtd 62 a lalut a, nikum aiin a letin sum a thawk chhuak hnem tawh zawk.

Diddy sum hmuhna lian ber chu Sean Jean clothing company-a a share ṭhenkhat a hralh vang a ni a, a clothing company share a hralh ṭhen aṭang hian USD mtd 70 zet a lalut. Hei bakah hian sumdawnna dang, Ciroc Vodka, DeLeon tequila leh Aquahydrate tui aṭangtein sum a lalut hnem hle. Hei bakah hian Bad Boy Records reunion tour aṭangin sum a lalut chho mek bawk.

Drake-a sum lakluhin hma a sawn chho zel. Nikum khan USD mtd 38.5 a lalut a, tunah chuan USD mtd 94 lalutin, sum lalut hnem pahnihna a ni ta. Nikum khan sum lakluh hnemah palina a ni a, kuminah chuan pahnihnaah a rawn kai. A sum lakluhna lian chu a music hralhna te, world tour a neih te, Apple leh Sprint nena deal lian tham deuh an neih aṭangtein a ni. USD mtd 42 lalut thei Jay-Z chu pathumna a ni.

Sum lalut hnem top 10-ah hian Dr. Dre - USD mtd 34.5, Chance the Rapper - USD mtd 33, Kendrick Lamar - USD mtd30, Wiz Khalifa - USD mtd 28, Pitbull - USD mtd 27, DJ Khaled - USD mtd 24 leh Future - USD mtd 23 te an lang. Hip-Hop khawvela mi, sum lalut hnem 20 tar chhuah zingah hmeichhe pakhat chauh a awm a, chu chu Nicki Minaj a ni. Nicki Minaj hian USD mtd 16 thawk chhuakin, 16-na a ni pha.