Heiham! Jaui'n hla thar a tichhuak e

'I hlutna' hmanga thiam taka Zofate min awitu Jaui chuan Zirtawpni khan hla thar 'Heiham' a tichhuak.

'Heiham' hi John Hnamte phuah niin, Jaui chuan,"He hla hi kum hnih kal ta khan a phuahtu hian ka sak atan tiin min pe tawh a, a hla dang ‘ A pawi lo ve’ tihte pawh ka lo sa tawh nghe nghe. Chang hnih awmin a phuah a, keiin a bridge hi ka ziah zawm ve leh ta a ni, tunah kan han dah chhuak ve thei ta hi ka lawm em em a ni!" tiin YouTube-ah a hla thar caption hi a ziak.

A hla a mawi piah lamah Jaui hian a sa mawiin a sa hnehsawh bawk a, ni thum pawh tling loah YouTube lamah thlirtu sing nga chuang an awm hman. Music Arrangement , Recording , Mixing & Mastering chu Hope Music kut chhuak vek a ni a, lyric video hmuh nuam takin Jaui hian a chhawp chhuak a, chu chu Remruata Bilywaif kut chhuak a ni ve bawk a ni.